ഇനി തന്മാത്ര റോബോട്ടുകള്‍

 

ഇനി തന്മാത്ര റോബോട്ടുകള്‍ 

ഒരു മില്ലിമീറ്ററിന്റെ ദശലക്ഷത്തിലൊന്നു മാത്രം വലുപ്പമുള്ള ഇത്തിരിക്കുഞ്ഞു റോബോട്ട്  തന്മാത്രകളുടെ  നിര്‍മാണമടക്കം പല ജോലികളും ചെയ്യും. ഈ തന്മാത്രാ റോബോട്ടിന്റെ പ്രവര്‍ത്തന അടിസ്ഥാനമാവട്ടെ ചില രാസപ്രവര്‍ത്തനങ്ങളും. ഈ സവിശേഷതകളുള്ള ആദ്യ തന്മാത്രാ റോബോട്ടിനെ  വികസിപ്പിച്ചെടുത്തത് മാഞ്ചസ്റ്റര്‍ സര്‍വകലാശാലാ ഗവേഷകരാണ്. ചലിക്കാനും ഒരു കുഞ്ഞു റോബോട്ടിക് കൈ ഉപയോഗിച്ച് മോളിക്കുലാര്‍ കാര്‍ഗോ നിര്‍മിക്കാനും കഴിയുന്നവിധം ഇവയെ പ്രോഗ്രാംചെയ്യാന്‍ കഴിയുമെന്നതാണ് ഈ തന്മാത്രാ റോബോട്ടുകളുടെ സവിശേഷത. വൈദ്യശാസ്ത്രത്തിലും നൂതന നിര്‍മാണപ്രക്രിയകളിലും തന്മാത്രാ ഫാക്ടറികളിലും അസംബ്ളി ലൈനിലുമെക്കെ വിസ്മയങ്ങളുടെ പെരുമഴപെയ്യിക്കാന്‍ ഈ അതിസൂക്ഷ്മ റോബോട്ടുകള്‍ക്ക് സാധിക്കും. മാഞ്ചസ്റ്റര്‍ സര്‍വകലാശാലയിലെ സ്കൂള്‍ ഓഫ് കെമിസ്ട്രിയില്‍ പ്രൊഫ. ഡേവിഡ് ലീയുടെ നേതൃത്വത്തിലുള്ള ഗവേഷകരാണ് അതിസൂക്ഷ്മ റോബോട്ടിക് ഗവേഷണത്തില്‍ നിര്‍ണായക ചുവടുവയ്പ് നടത്തിയത്.

ദ്രവ്യത്തിന്റെ അടിസ്ഥാന നിര്‍മാണ ഘടകമാണ് ആറ്റങ്ങള്‍. ആറ്റങ്ങള്‍ ചേര്‍ന്നാണ് തന്മാത്രകള്‍ ഉണ്ടാവുന്നത്. ഒരോ ഇത്തിരിക്കുഞ്ഞു റോബോട്ടിലും 150 കാര്‍ബണ്‍, ഹൈഡ്രജന്‍, ഓക്സിജന്‍, നൈട്രജന്‍ എന്നീ ആറ്റങ്ങള്‍ മാത്രമാണുള്ളത്. ഇത്തരം ശതകോടി റോബാട്ടുകള്‍ എടുത്താലും അതിന്  ഏതാനും ഉപ്പുതരികളുടെ വ്യാപ്തമേ ഉണ്ടാവൂ. പ്രത്യേക ലായനികളില്‍ നടത്തുന്ന രാസപ്രവര്‍ത്തനങ്ങളാണ്  ഈ റോബോട്ടുകളുടെ പ്രവര്‍ത്തനത്തിന് അടിസ്ഥാനം. ഇത് ശാസ്ത്രജ്ഞര്‍ക്ക് പ്രത്യേക രീതിയില്‍ നിയന്ത്രിക്കാനും അടിസ്ഥാനജോലികള്‍ ചെയ്യിക്കാനുതകുന്നതരത്തില്‍ പ്രോഗ്രാം ചെയ്യാനും സാധിക്കും. കെമിക്കല്‍ ഇന്‍പുട്ടുകളാല്‍ പ്രോഗ്രാംചെയ്ത നിര്‍ദേശങ്ങള്‍ക്കനുസരിച്ച് റോബോട്ടുകള്‍ പ്രവര്‍ത്തിക്കും. യന്ത്രങ്ങളുടെ അതിസൂക്ഷ്മവല്‍കരണത്തിന്റെ അത്ഭുതലോകത്തിലേക്കാണ് തന്മാത്രാ റോബോട്ടുകള്‍ വാതില്‍ തുറക്കുന്നത്. യന്ത്രങ്ങളുടെ വലുപ്പം ഇനിയും അതിസൂക്ഷ്മമാക്കാനാണ് തങ്ങള്‍ ശ്രമിക്കുന്നതെന്നും അടുത്ത ഒന്നോ രണ്ടോ ദശകത്തിനിടയില്‍ തന്മാത്രാ ഫാക്ടറികളില്‍ തന്മാത്രകളും പദാര്‍ഥങ്ങളും നിര്‍മിക്കാന്‍ ഇത്തരം ഇത്തിരിക്കുഞ്ഞു റോബോട്ടുകളെ വ്യാപകമായി ഉപയോഗിക്കാന്‍ സാധിക്കുമെന്നാണ് പ്രതീക്ഷയെന്നും  പ്രൊഫ. ഡേവിഡ് ലീ പറയുന്നു.
നാനോ റോബോട്ടുകളുടെ  രൂപകല്‍പ്പനയും അവയുടെ  പ്രവര്‍ത്തന നിയന്ത്രണവും അതിസങ്കീര്‍ണമാണ്. എന്നാല്‍ ഇവിടെ ലളിതമായ രാസപ്രക്രിയയെ അടിസ്ഥാനമാക്കിയാണ് ഇത്തിരിക്കുഞ്ഞു റോബോട്ടുകളുടെ പ്രവര്‍ത്തനം. റോബോട്ടുകളെ കൂട്ടിയിണക്കുന്നതും  പ്രവര്‍ത്തനസജ്ജമാക്കുന്നതും രസതന്ത്രമാണ്. ആറ്റങ്ങളും തന്മാത്രകളും തമ്മിലുള്ള പ്രവര്‍ത്തനം, ചെറിയ തന്മാത്രകളില്‍നിന്ന് വലിയ തന്മാത്രകളുണ്ടാക്കുന്നതിന്റെ ശാസ്ത്രം എന്നിവതന്നെയാണ് ഇത്തരം ഗവേഷണങ്ങളുടെ അടിസ്ഥാനം.
ലഘുതന്മാത്രകളില്‍നിന്ന് ഔഷധങ്ങളും പ്ളാസ്റ്റിക്കുകളുമൊക്കെ  നിര്‍മിക്കുന്ന പ്രക്രിയക്കും സമാനമാണിത്. ഒരിക്കല്‍ നാനോ റോബോട്ടുകള്‍ നിര്‍മിച്ചാല്‍പ്പിന്നെ  കെമിക്കല്‍ ഇന്‍പുട്ടുകള്‍ നല്‍കിക്കൊണ്ട് അതിനെ വിവിധ പ്രവര്‍ത്തനങ്ങള്‍ക്കായി സജ്ജമാക്കാന്‍ കഴിയും. ഒരു കംപ്യൂട്ടര്‍ പ്രോഗ്രാംപോലെ ഈ കെമിക്കല്‍ ഇന്‍പുട്ടുകള്‍ റോബോട്ടുകള്‍ക്ക് എന്തൊക്കെ പ്രവര്‍ത്തനം എങ്ങനെയൊക്കെ, എപ്പോഴൊക്കെ ചെയ്യണമെന്ന് നിര്‍ദേശം നല്‍കും.
തന്മാത്രാ റോബോട്ടുകളുടെ സാധ്യതകള്‍ അനന്തമാണ്. ഫാക്ടറികളും യന്ത്രങ്ങളുമൊക്കെ  അതിസൂക്ഷ്മമാവുന്നതോടെ  നിലവില്‍ ഉപയോഗിക്കുന്ന വിവിധ പദാര്‍ഥങ്ങളുടെ ഉപയോഗവും കുറയ്ക്കാന്‍സാധിക്കും. കുറഞ്ഞ ഊര്‍ജ ഉപയോഗം, നൂതന ഔഷധങ്ങളുടെ രൂപകല്‍പ്പന, നിര്‍മാണം, നാനോപദാര്‍ഥങ്ങള്‍ അടക്കമുള്ള നൂതന സവശേഷതകളുള്ള പദാര്‍ഥങ്ങളുടെ നിര്‍മാണം, അപകടകരമായ രാസവസ്തുക്കളുടെ സംസ്കരണം, ഓസോണ്‍ പാളിയില്‍ അറ്റകുറ്റപ്പണി നടത്തല്‍ എന്നിവയൊക്കെ ഇതില്‍ ചിലതുമാത്രം.
മറ്റു പല ഉല്‍പ്പന്നങ്ങളുടെയും വലുപ്പം കുറയാനും ഇത് വഴിയൊരുക്കും. ശരീരത്തിനുള്ളില്‍ ഓടിനടന്ന് അറ്റകുറ്റപ്പണി നടത്തി തകരാറുകള്‍ അതതുസമയം പരിഹരിക്കുകയും ശസ്ത്രക്രിയകള്‍  നടത്തുകയുമൊക്കെ ചെയ്യുന്ന നാനോ  റോബോട്ടുകള്‍ ഇനി അധികകാലം ഒരു സയന്‍സ് ഫിക്ഷന്‍  മാത്രമായി തുടരില്ല.


എന്താണ് റോബോട്ട്?
സ്വന്തമായോ അല്ലെങ്കില്‍ നിര്‍ദേശങ്ങള്‍ക്കനുസരിച്ചോ പ്രവര്‍ത്തിക്കുന്ന ഒരു ഇലക്ട്രോ മെക്കാനിക്കല്‍ ഉപകരണമാണ് റോബോട്ട്. ഇലക്ട്രോണിക് പ്രോഗ്രാമുകള്‍ക്കനുസരിച്ചാണ് സാധാരണ പ്രവര്‍ത്തിക്കുന്നത്. ഒരു ബാഹ്യ നിയന്ത്രണസംവിധാനം ഉപയോഗിച്ചോ റോബോട്ടിനുള്ളില്‍ സാധ്യമാക്കിയിരിക്കുന്ന നിയന്ത്രണസംവിധാനം ഉപയോഗിച്ചോ റോബോട്ടിനെ നിയന്ത്രിക്കാന്‍ സാധിക്കും. റോബോട്ടിനെ യന്ത്രമനുഷ്യന്‍ എന്നു വിളിക്കാറുണ്ടെങ്കിലും പലപ്പാഴും റോബോട്ടിന് മനുഷ്യരൂപം ഉണ്ടാകാറില്ല. ഒരോ ജോലിക്കും അനുസൃതമായ രൂപമാണ് റോബോട്ടിനുണ്ടാവുക. ഓട്ടോണാമസ് റോബോട്ടുകളും സെമി ഓട്ടോണമസ് റോബോട്ടുകളുമുണ്ട്.
1920ല്‍ ചെക്ക് എഴുത്തുകാരനായ കാരെല്‍ കാപ്പെക് രചിച്ച RUR (റോസംസ് യൂണിവേഴ്സല്‍ റോബോട്സ്) എന്ന നാടകത്തിലാണ് റോബോട്ട് എന്ന വാക്ക് ആദ്യം ഉപയോഗിക്കപ്പെട്ടത്. സയന്‍സ് ഫിക്ഷന്‍രംഗത്തെ അതികായനായ ഐസക് അസിമോവ് ആണ് റോബോട്ടുകളെക്കുറിച്ചുള്ള പഠനം, അവയുടെ രൂപകല്‍പ്പന, നിര്‍മാണം എന്നിവയെ സൂചിപ്പിക്കാന്‍ റോബോട്ടിക്സ് എന്ന വാക്ക് ആദ്യം അവതരിപ്പിച്ചത്. 1941ലായിരുന്നു ഇത്. റോബോട്ടുകളുടെ അനന്തസാധ്യതകളെക്കുറിച്ച് അദ്ദേഹം പ്രവചിക്കുകയും ചെയ്തു. 1942ല്‍ 'റോബോട്ടിക്സിലെ മൂന്നു നിയമങ്ങള്‍' ഉള്‍ക്കൊള്ളുന്ന റണ്‍ എറൌണ്ട് എന്ന ശാസ്ത്രകല്‍പ്പിത കഥ അദ്ദേഹം രചിച്ചു. ഇദ്ദേഹത്തിന്റെ റോബോട്ട് സീരീസില്‍ 38 ശാസ്ത്രകല്‍പ്പിത കഥകളും അഞ്ചു നോവലുകളുമുണ്ട്. 1948ല്‍ സൈബര്‍നെറ്റിക്സിന്റെ സാധ്യതകള്‍ നോബര്‍ട്ട് വീനര്‍ അവതരിപ്പിച്ചു. നിര്‍മിതബുദ്ധി (Artificial Intelligence)  സംബന്ധിച്ച ഗവേഷണത്തിന്റെ സാധ്യതകള്‍ ശാസ്ത്രലോകത്ത് ചര്‍ച്ചാവിഷയമായി.

റോബോട്ടിക്സും ആര്‍ട്ടിഫിഷ്യല്‍ ഇന്റലിജന്‍സും
റോബോട്ടുകളുടെ രൂപകല്‍പ്പന, നിര്‍മാണം, പ്രവര്‍ത്തനം, പ്രായോഗിക സാധ്യതകള്‍ എന്നിവയെക്കുറിച്ചൊക്കെ പഠിക്കുന്ന ശാസ്ത്ര സാങ്കേതികശാഖയാണ് റോബോട്ടിക്സ്. ഇന്ന് വീടുകളില്‍മുതല്‍ ബഹിരാകാശ ഗവേഷണങ്ങളില്‍വരെ റോബോട്ടുകള്‍ ഉപയോഗിക്കുന്നുണ്ട്. 1948ല്‍ ഇംഗ്ളണ്ടിലെ ബ്രിസ്റ്റോളില്‍ വില്യം ഗ്രേ വാള്‍ട്ടര്‍ നിര്‍മിച്ച ഇലക്ട്രോണിക് ഓട്ടണോമസ് റോബോട്ടുകളും(ആമയുടെ ആകൃതിയായിരുന്നു ഇവയ്ക്ക്) 1940കളുടെ അവസാനം ജോണ്‍ ടി പാര്‍സണ്‍സ്, ഫ്രാങ്ക് എല്‍ സ്റ്റുളെന്‍ എന്നിവര്‍ വികസിപ്പിച്ചെടുത്ത കംപ്യൂട്ടര്‍ ന്യൂമെറിക്കല്‍ കണ്‍ട്രോള്‍ മെഷീനുകളും റോബോട്ടുകളുടെ ചരിത്രത്തിലെ നിര്‍ണായക ചുവടുവയ്പായിരുന്നു.
1954ല്‍ ജോര്‍ജ് ഡെവല്‍ വികസിപ്പിച്ചെടുത്ത യൂണിമേറ്റ് ആണ് ആദ്യ കൊമഴ്സ്യല്‍, ഡിജിറ്റല്‍, പ്രോഗ്രാമബിള്‍ റോബോട്ട്. 1956ല്‍ ഡെവലും ജോസഫ് എഞ്ചല്‍ബെര്‍ഗെറും ചേര്‍ന്ന് ആദ്യ റോബോട്ട് കമ്പനി സ്ഥാപിച്ചു. 1959ല്‍ കംപ്യൂട്ടര്‍ അസിസ്റ്റഡ് മാനുഫാക്ചറിങ് മസാച്ചൂസെറ്റ്സ് യൂണവേഴ്സിറ്റി ഓഫ് ടെക്നോളജിയിലെ സെര്‍വോ മെക്കാനിസംസ് ലാബില്‍ അവതരിപ്പിക്കപ്പെട്ടു. യൂണിമേറ്റ് റോബോട്ടിനെ 1961ല്‍ ജനറല്‍ റോമോട്ടേഴ്സിനു വില്‍ക്കുകയും ഇതിനെ ന്യൂ ജഴ്സിയിലെ ഇന്‍ലാന്‍ഡ് ഫിഷര്‍ ഗൈഡ് ഓട്ടോമൊബൈല്‍പ്ളാന്റില്‍ ഉരുകിയ ലോഹകഷണങ്ങള്‍ എടുക്കാന്‍ ഉപയോഗിക്കുകയും ചെയ്തു. 1966ല്‍ സ്റ്റാന്‍ഫഡ് റിസര്‍ച്ച് ഇന്‍സ്റ്റിറ്റ്യൂട്ട് വികസിപ്പിച്ചെടുത്ത റേഷക്കി എന്ന റോബോട്ട്, 1979ല്‍ വികസിപ്പിച്ചെടുക്കപ്പെട്ട സ്റ്റാന്‍ഫഡ് കാര്‍ട്ട് എന്ന റോവര്‍, 1993ല്‍ അന്റാര്‍ട്ടിക്കിലെ മൌണ്ട് എറിബസ് അഗ്നിപര്‍വതത്തില്‍ പര്യവേക്ഷണത്തിന് ഉപയോഗപ്പെടുത്താന്‍ നിര്‍മിച്ച ഡാന്റെ എന്ന എട്ട് കാലുള്ള റോബോട്ട് എന്നിവയൊക്കെ ലോകശ്രദ്ധ നേടി. 1972ല്‍ ജപ്പാനിലെ വസേദ സര്‍വകലാശാല വികസിപ്പിച്ചെടുത്ത ഹ്യൂമനോയ്ഡ് റോബോട്ട് ആണ് വാബോട്ട്
2000ല്‍ ഹോണ്ട വികസിപ്പിച്ചെടുത്ത അസിമോ (ASIMO  Advanced Step In Innovative Mobility) ഹ്യൂമനോയ്ഡ് റോബോട്ടുകളുടെ ചരിത്രത്തിലെ വഴിത്തിരിവായി. 2002 ഐ റോബോട്ട് കമ്പനി വികസിപ്പിച്ചെടുത്ത റോബോട്ടിക് വാക്വം ക്ളീനര്‍ ആണ് റൂംബ.  1997ല്‍ ചൊവ്വാ പര്യവേക്ഷണത്തിനായി നാസ 1997ല്‍ സെജേണര്‍ റോവറും 2004ല്‍ സ്പിരിറ്റ്, ഓപ്പര്‍ച്യൂണിറ്റി റോവറുകളും ഉപയോഗിച്ചു. 2004ല്‍ കോര്‍ണല്‍ സര്‍വകലാശാലാ ഗവേഷകര്‍ സ്വയം പകര്‍പ്പുകള്‍ നിര്‍മിക്കാന്‍കഴിയുന്ന റോബോട്ടിനെ വികസിപ്പിച്ചെടുത്തു. നാസ 2012ല്‍ ഡിസ്കവറി ദൌത്യത്തില്‍ റോബോനോട്ട്-2 അഥവാ R2  എന്ന ഹ്യൂമനോയ്ഡ് റോബോട്ടിനെ ആദ്യമായി അന്താരാഷ്ട്ര ബഹിരാകാശനിലയത്തില്‍ എത്തിച്ചു.
മനുഷ്യനെപ്പോലെത്തന്നെ ചിന്തിക്കുകയും പ്രവര്‍ത്തിക്കുകയും ചെയ്യുന്ന റോബോട്ടുകളെ വികസിപ്പിച്ചെടുക്കാനുള്ള ശ്രമങ്ങള്‍ ആര്‍ട്ടിഫിഷ്യല്‍ ഇന്റലിജന്‍സ് രംഗത്ത്  മുന്നേറ;ന്നു. പൂര്‍ണമായും മനുഷ്യമസ്തിഷ്കത്തെ അനുകരിക്കുന്ന യന്ത്രങ്ങളുടെയും റോബോട്ടുകളുടെയും സൃഷ്ടിയില്‍ സ്റ്റീഫന്‍ ഹോക്കിങ്ങും മറ്റു പല ശാസ്ത്രജ്ഞരും ആശങ്ക രേഖപ്പെടുത്തിക്കഴിഞ്ഞു.

കടപ്പാട്-deshabhimani.-കിളിവാതില്‍