ലോക ബഹിരാകാശ വാരം

ലോക ബഹിരാകാശ വാരം

ലോകത്ത് ഏറ്റവുമധികം ജനങ്ങള്‍ ഒരുമിച്ച് ആഘോഷിക്കുന്ന വാരമാണ് ലോക ബഹിരാകാശവാരമെന്നു പറയാം. എല്ലാ വര്‍ഷവും ഒക്ടോബര്‍ നാലുമുതല്‍ 10 വരെയാണ് ഈ ആഘോഷം നടക്കുന്നത്. ഭൂമിക്ക് വെളിയിലേക്കു പറക്കാനുള്ള മനുഷ്യ ത്വരയുടെ ആദ്യ അടയാളമായ സ്ഫുട്നിക്-1 ന്റെ വിക്ഷേപണദിവസമായ ഒക്ടോബര്‍ 4ഉം (1957 ഒക്ടോബര്‍ 4) ബഹിരാകാശം ആരുടെയും കുത്തകാവകാശമല്ലെന്നു പ്രഖ്യാപിക്കപ്പെട്ട ഒക്ടോബര്‍ 10ഉം (1967 ഒക്ടോബര്‍ 10) ശാസ്ത്രലോകത്തിന് സ്മരണീയമായതുകൊണ്ടാണ് എല്ലാ വര്‍ഷവും ഒക്ടോബര്‍ നാലുമുതല്‍ 10 വരെ ലോക ബഹിരാകാശവാരമായി ആഘോഷിക്കുന്നത്.
ബഹിരാകാശം ലോകത്തിലെ ഏറ്റവും വലിയ പരീക്ഷണശാലയാണ്. വാര്‍ത്താവിനിമയരംഗത്തും ഗതിനിര്‍ണയത്തിലും ആധുനിക വൈദ്യശാസ്ത്രത്തിലുമെല്ലാം നമുക്ക് ലഭ്യമായ പുരോഗതി ബഹിരാകാശ ഗവേഷണങ്ങള്‍വഴിയാണ്. കാലാവസ്ഥാ പ്രവചനം, സുനാമി മുന്നറിയിപ്പ്, കൊടുങ്കാറ്റുകളെക്കുറിച്ചുള്ള പ്രവചനം, ജിപിഎസ്സംവിധാനങ്ങള്‍, സൈനിക-സൈനികേതര ആവശ്യങ്ങള്‍, വെള്ളപ്പൊക്കം, വരള്‍ച്ച, പുതിയ വിത്തിനങ്ങളുടെ ഉല്‍പ്പാദനം തുടങ്ങിയവയെല്ലാം നിര്‍ണയിക്കുന്നത് ബഹിരാകാശ പരീക്ഷണശാലകളാണ്. ഇതിനെല്ലാം പുറമെ എന്താണ് പ്രപഞ്ചമെന്നും നാം എങ്ങനെ പ്രപഞ്ചത്തിന്റെ ആരുമറിയാത്ത ഇടത്തില്‍ നിന്നുകൊണ്ട് ഈ മഹാപ്രഞ്ചമൊന്നാകെ നിരീക്ഷിക്കുന്നതും ബഹിരാകാശ പര്യവേക്ഷണങ്ങളിലൂടെയാണ്. 
ബഹിരാകാശചരിത്രത്തിന്റെ ചുമലുകളില്‍ നിന്ന് ഭാവിയിലേക്കാണ് ശാസ്ത്രം നോക്കുന്നത്. കൂടുതല്‍ ദൌത്യങ്ങളുടെയും ലക്ഷ്യം അതുതന്നെയാണ്.
ഭാവിപദ്ധതികള്‍- നാസ
ആം
ഛിന്നഗ്രഹത്തിലേക്കുള്ള നാസയുടെ ആദ്യ റോബോട്ടിക് ദൌത്യമാണ് ആം (Asteroid Redirect Robotic Mission - ARRM).- ‘. ‘ഭൂമിക്ക് ഭീഷണിയായേക്കാവുന്ന ഇത്തരം ‘ഭൌമ സമീപ ഛിന്നഗ്രഹങ്ങളില്‍ ഇറങ്ങുന്ന പേടകം ഛിന്നഗ്രഹത്തിന്റെ ഉപരിതലത്തില്‍നിന്ന് മണ്ണും പാറയും ശേഖരിക്കുകയും തുടര്‍ന്ന് ഛിന്നഗ്രഹത്തെ ചന്ദ്രനുചുറ്റുമുള്ള ഒരു സ്ഥിര ഭ്രമണപഥത്തിലേക്ക് തള്ളിനീക്കുകയും ചെയ്യും. 2020കളിലാണ് നാസ ഈ പദ്ധതി നടപ്പാക്കുന്നത്. 2030കളില്‍ ചൊവ്വയിലേക്ക് മനുഷ്യരെ അയക്കുന്നതിനു മുന്നോടിയായുള്ള സ്പേസ് ഫൈളേറ്റ് പരിശീലനമായും ഈ ദൌത്യത്തെ കാണാന്‍കഴിയും. 2021ലാണ് ആദ്യത്തെ ആം ദൌത്യം വിക്ഷേപിക്കുന്നത്. നാസയുടെ ജെറ്റ് പ്രൊപ്പല്‍ഷന്‍ ലബോറട്ടറിയാണ് ദൌത്യത്തിന്റെ ചുക്കാന്‍പിടിക്കുന്നത്.
ഇക്കോസ്ട്രെസ്
സസ്യങ്ങളുടെ ഇലകളിലുള്ള സൂക്ഷ്മ സുഷിരങ്ങളിലൂടെ ജലം അന്തരീക്ഷത്തിലേക്കു വ്യാപിക്കുന്നത് നിരീക്ഷിക്കുന്നതിനുവേണ്ടി അന്താരാഷ്ട്ര ബഹിരാകാശനിലയത്തില്‍ സജ്ജീകരിക്കുന്ന പരീക്ഷണശാലയാണ് ഇക്കോസ്ട്രെസ് (The ECOsystem Spaceborne Thermal  Ra-diometer Experiment on Space Station ECOSTRESS-). ചുറ്റുപാടുമുള്ള മണ്ണില്‍നിന്നുള്ള ജലത്തിന്റെ ബാഷ്പീകരണം സസ്യസ്വേദനത്തെ സാധ്വീനിക്കുന്നുണ്ട്. ഇക്കോസ്ട്രെസ് ഈ ബാഷ്പീകരണവും ഇലകളില്‍നിന്നുള്ള സ്വേദനവും ഒരുമിച്ച് അളക്കും . ഇതിലൂടെ ജലലഭ്യതയ്ക്കനുസരിച്ച് ‘ഭൂമുഖത്തെ സസ്യജാലങ്ങള്‍ക്കുണ്ടാകുന്ന മാറ്റങ്ങളും, ആഗോള കാര്‍ബണ്‍ ചക്രത്തിന്റെ മാറ്റവും, സവിശേഷതയും കണ്ടെത്താന്‍കഴിയും. കൂടാതെ വരള്‍ച്ച മുന്‍കൂട്ടി കണ്ട് വരള്‍ച്ചാസാധ്യതയുള്ള പ്രദേശങ്ങളില്‍ കൃഷിചെയ്യുന്നതിന് അനുയോജ്യമായ വിത്തിനങ്ങള്‍ വികസിപ്പിക്കുന്നതിനും ഈ ദൌത്യത്തിലൂടെ സാധിക്കും.
മയ
അന്തരീക്ഷ മലിനീകരണത്തെക്കുറിച്ചു പഠിക്കുന്നതിനായി 2019 ല്‍ നാസ വിക്ഷേപിക്കുന്ന ദൌത്യമാണ് മയ (MAIA-). ഭൌമാന്തരീക്ഷത്തിലെത്തുന്ന പൊടിപടലങ്ങള്‍ സൃഷ്ടിക്കുന്ന ആരോഗ്യപ്രശ്നങ്ങള്‍ എത്രത്തോളമാണെന്നു കണ്ടെത്തുകയും, ഇതിനു കാരണമായ പൊടിപടലങ്ങളില്‍ അടങ്ങിയ രാസവസ്തുക്കളുടെ തോത് കണ്ടെത്തുകയുമാണ് ദൌത്യത്തിന്റെ ലക്ഷ്യം. ഇത്തരം രാസവസ്തുക്കളുടെ ഉല്‍പ്പാദനവും ഉപയോഗവും കുറയ്ക്കുന്നതിന് രാഷ്ട്രങ്ങളെ പ്രേരിപ്പിക്കുന്നതിനും ഈ ദൌത്യത്തിനുകഴിയും. അന്തരീക്ഷത്തിലുള്ള എയ്റോസോളിന്റെ അളവ് കൃത്യമായി കണക്കുകൂട്ടാന്‍ ഈ ദൌത്യത്തിനുകഴിയും. ജനിതകവൈകല്യങ്ങള്‍, ഹൃദയസംബന്ധിയായ രോഗങ്ങള്‍, ശിശുമരണം തുടങ്ങി നിരവധി ഗുരുതര ആരോഗ്യപ്രശ്നങ്ങള്‍ക്ക് എയ്റോസോള്‍ കാരണമാകുന്നുണ്ട്.
ഗ്രേസ്-ഫോ
ജര്‍മന്‍ സഹകരണത്തോടെ(German ResearchCentreFor Geosciences) നാസ വിക്ഷേപിക്കുന്ന ബഹിരാകാശപേടകമാണ് ഗ്രേസ് ഫോ(TheGravtiy Recoveryand Climate Experimentfollow–on GRACEFO-). 2002 മാര്‍ച്ച് 17ന് നാസ വിക്ഷേപിച്ച ഗ്രേസ് ദൌത്യത്തിന്റെ തുടര്‍ച്ചയാണിത്. ഭൌമോപരിതലത്തില്‍ വിവിധ പ്രദേശങ്ങളില്‍ വ്യത്യസ്ത തോതില്‍ അനുഭവപ്പെടുന്ന ഗുരുത്വാകര്‍ഷണബലം കൃത്യമായി കണ്ടെത്തുകയും അതുവഴി ഓരോ 30 ദിവസന്തോറും ഭൂമിയുടെ ഗ്രാവിറ്റി മാപ് നിര്‍മിക്കുകയുമാണ് പേടകം ചെയ്യുന്നത്. സമുദ്രയാത്രകള്‍ക്കും റോക്കറ്റ് വിക്ഷേപണത്തിനും വളരെയേറെ പ്രയോജനകരമാണ് ഗ്രേസ്-ഫോ ദൌത്യം. 2022 ലാണ് ഈ ദൌത്യം വിക്ഷേപിക്കാന്‍ ഉദ്ദേശിക്കുന്നത്.
യൂക്ളിഡ്
പ്രപഞ്ചത്തിലെ നിഗൂഢ പ്രതിഭാസങ്ങളെന്ന് വിശേഷിപ്പിക്കുന്ന ഡാര്‍ക് മാറ്ററിനെയും ഡാര്‍ക് എനര്‍ജിയെയുംകുറിച്ച് പഠിക്കുന്നതിനുള്ള നാസ-യൂറോപ്യന്‍ സ്പേസ് ഏജന്‍സി സംയുക്തസംരംഭമാണ് യൂക്ളിഡ്(EUCLID) ദൌത്യം. പ്രപഞ്ചത്തില്‍ 68 ശതമാനം ഭാഗവും ഡാര്‍ക് എനര്‍ജിയും 27 ശതമാനം ഭാഗം ഡാര്‍ക് മാറ്ററും ആണെന്നാണ് കണക്കാക്കപ്പെട്ടിരിക്കുന്നത്. ഗ്യാലക്സികളും നെബുലകളും വാതകപടലങ്ങളുമെല്ലാം അടങ്ങുന്ന ബേര്യോണിക് മാറ്റര്‍ കേവലം അഞ്ചുശതമാനം മാത്രമേയുള്ളൂ. 2020ല്‍ വിക്ഷേപിക്കുന്ന ഈ ദൌത്യം പ്രപഞ്ചത്തിന്റെ ഇരുവശത്തെക്കുറിച്ച് കൂടുതല്‍ ധാരണകള്‍ നല്‍കാന്‍ പര്യാപ്തമാകും. അതുവഴി പ്രപഞ്ചത്തിന്റെ ആകൃതിയും അതിന്റെ ഭാവിയും നിര്‍ണയിക്കുന്നതിനു സാധിക്കും. പ്രപഞ്ചവികാസത്തിന്റെ വേഗം കൃത്യമായി അളക്കുന്നതിനും യൂക്ളിഡ് ദൌത്യത്തിനുകഴിയും

ചാന്ദ്രയാന്‍ 2
ഇന്ത്യയുടെ രണ്ടാമത്തെ ചാന്ദ്രദൌത്യമായ ചാന്ദ്രയാന്‍ 2 ഐഎസ്ആര്‍ഒ സ്വന്തമായി വികസിപ്പിച്ചെടുത്ത ക്രയോജനിക് റോക്കറ്റായ ജിഎസ്എല്‍വി(GSLV MK II) ഉപയോഗിച്ച് 2018ല്‍ വിക്ഷേപിക്കും. ഇതൊരു ലാന്‍ഡര്‍-റോവര്‍ ദൌത്യമാണ്.ചാന്ദ്രയാന്‍ 1, തുടങ്ങിവച്ചതിന്റെ തുടര്‍ച്ചയാണ് ഈ ദൌത്യം അന്വേഷിക്കുന്നത്. അതായത് ചാന്ദ്രധൂളിയിലെ ജലസാന്നിധ്യം. ഭാവിയില്‍ ലൂണാര്‍ ഔട്ട്പോസ്റ്റുകള്‍ നിര്‍മിക്കുമ്പോള്‍ ഇത്തരം ജലസാന്നിധ്യമുള്ള മേഖലകള്‍ കണ്ടെത്തുന്നത് പ്രാധാന്യമുള്ള സംഗതിയാണ്.
ആദിത്യ
സൂര്യന്റെ അന്തരീക്ഷമായ കൊറോണയില്‍ സംഭവിക്കുന്ന പ്രതിഭാസങ്ങളെക്കുറിച്ചു പഠിക്കാന്‍ ഇസ്രോ വിക്ഷേപിക്കുന്നഈ ദൌത്യം ദൃശ്യപ്രകാശത്തിലും ഇന്‍ഫ്രാറെഡ് വേവ്ബാന്‍ഡിലും സൂര്യാന്തരീക്ഷത്തെ നിരീക്ഷിക്കും. കൃത്രിമ ഉപഗ്രഹങ്ങളുടെ പ്രവര്‍ത്തനങ്ങള്‍ക്കും, വാര്‍ത്താവിനിമയ സംവിധാനങ്ങള്‍ക്കും, വൈദ്യുതിവിതരണസംവിധാനങ്ങള്‍ക്കുമെല്ലാം ഗുരുതരമായി ബാധിക്കുന്ന സൌരവാതങ്ങല്‍ ഉത്ഭവിക്കുന്നത് കൊറോണല്‍ മാസ് ഇജക്ഷന്‍ എന്ന് അറിയപ്പെടുന്ന സൌരാന്തരീക്ഷത്തിലെ പ്രക്ഷുബ്ധതകളാണ്. ഇത്തരം പ്രക്ഷുബ്ധതകള്‍ മുന്‍കൂട്ടി കണ്ടെത്തുകയാണ് ആദിത്യ  ദൌത്യത്തിന്റെ ലക്ഷ്യം. സൌരവാതങ്ങളുടെ വേഗം അളക്കുന്നതുവഴി അവ ഭൂമിയില്‍ ഉണ്ടാക്കാന്‍ സാധ്യതയുള്ള പ്രത്യാഘാതങ്ങളെക്കുറിച്ച് മുന്നറിയിപ്പു നല്‍കുന്നതിനും ആദിത്യ ദൌത്യത്തിനു കഴിയും.
അവതാര്‍
ഇസ്രോയുടെ സ്പേസ് ഷട്ടില്‍ ദൌത്യമാണ് അവതാര്‍ (AVATAR).. (Reusable Launch Vehicle-Technology Demonstrator- RLV-TD). .നാസ സ്പേസ്ഷട്ടില്‍ പദ്ധതി അവസാനിപ്പിച്ചതുകൊണ്ട് നിലവില്‍ അന്താരാഷ്ട്ര ബഹിരാകാശ നിലയത്തിലേക്ക് ആളുകളെയുംമറ്റ്സാധനസാമഗ്രികളുംഎത്തിക്കുന്നത് റഷ്യയുടെ പേടകങ്ങളിലാണ്. 2025ല്‍ അവതാര്‍ യാഥാര്‍ഥ്യമാകുമ്പോള്‍അത്ഇസ്രോയുടെമറ്റൊരുവലിയനേട്ടമാകും.ബഹിരാകാശ ടൂറിസംമേഖലയിലും ഇത് വലിയ മാറ്റം കൊണ്ടുവരും. അവതാര്‍ പദ്ധതിസാമ്പത്തികമായും ഇസ്രോയ്ക്ക് വലിയ നേട്ടമുണ്ടാക്കും.
റിസാറ്റ് 1
ഇസ്രോ വിക്ഷേപിക്കുന്ന റഡാര്‍ ഇമേജിങ് സാറ്റലൈറ്റ് ആണ് റിസാറ്റ്-1അ. മുമ്പ് വിക്ഷേപിച്ച റിസാറ്റ്-1ന്റെ പരിഷ്കരിച്ച പതിപ്പാണിത്. ഭൂതല മാപ്പിങ്ങും സമുദ്രത്തിന്റെ മാപ്പിങ്ങും നടത്തുന്ന ഈ ദൌത്യം മണ്ണിലെ ഈര്‍പ്പത്തിന്റെ തോത് കണ്ടുപിടിക്കുന്നതിനും ഉപയോഗിക്കാന്‍കഴിയും.
 

കടപ്പാട്-deshabhimani