ഹരിതം
ഈ രസതന്ത്രംശാസ്ത്രത്തിന്റെ പുരോഗതിക്കൊപ്പം പാരിസ്ഥിതിക പ്രശ്നങ്ങളും വര്‍ധിച്ചു വരികയാണല്ലോ. ഇവയ്ക്കാവശ്യമായ പരിഹാരം പലപ്പോഴും ശാസ്ത്രത്തിനുതന്നെ വെല്ലുവിളിയാകാറുണ്ട്. ജീവജാലങ്ങളുടെ സുരക്ഷയും പാരിസ്ഥിതികമായ നേട്ടങ്ങളും ഉറപ്പ് വരുത്തുന്ന ഒരു ശാസ്ത്ര ശാഖയാണ് ഹരിത രസതന്ത്രം ഈ ശാസ്ത്രശാഖയുടെ വരവോടെ പ്രകൃതിക്ക് ദോഷം ചെയ്യുന്ന അപകടകാരികളായ രാസവസ്തുക്കളെ നിരുപദ്രവകാരികളാക്കി മാറ്റി ധാരാളം പരിസ്ഥിതി സൌഹൃദ ഉല്‍പന്ന നിര്‍മാണത്തില്‍ ശാസ്ത്രം വിജയിച്ചു കൊണ്ടിരിക്കുന്നു. ജൈവ ഇന്ധനങ്ങളും പാഴ്വസ്തുക്കളില്‍നിന്നുള്ള മെഥനോളും ഗ്രീന്‍ കംപ്യൂട്ടിങ്ങും പോലെയുള്ള ഹരിത രസതന്ത്ര സംഭാവനകള്‍ പാരിസ്ഥിതിക മാലിന്യങ്ങള്‍ക്ക് പരിഹാരമായിക്കൊണ്ടിരിക്കുകയാണ്.ലോകമെങ്ങും ചര്‍ച്ചാവിഷയമായിക്കൊണ്ടിരിക്കുന്ന ഹരിതരസതന്ത്രത്തെക്കുറിച്ച് വായിക്കാം.
അബദ്ധങ്ങളിലുറങ്ങിയ ശാസ്ത്രം
രസതന്ത്രത്തിന്റെ പല കണ്ടുപിടിത്തങ്ങളും മനുഷ്യരാശിക്ക് വിനയായി മാറിയിട്ടുണ്ട്. ഇന്ത്യയിലെ ഭോപ്പാല്‍ ദുരന്തം, ഉക്രൈനിലെ ചെര്‍ണോബില്‍ ദുരന്തം, ജപ്പാനിലെ മീനമാതാ ദുരന്തം, ഇത്തായ് ഇത്തായ് ദുരന്തം, കാസര്‍കോട്ടെ എന്‍ഡോസള്‍ഫാന്‍ ദുരന്തം തുടങ്ങി എണ്ണമറ്റ ദുരന്തങ്ങള്‍ ഇതിന് ഉദാഹരണങ്ങളാണ്. ഇത്തരം ദുരന്തങ്ങള്‍ ആവര്‍ത്തിക്കാതിരിക്കാനുള്ള ശാസ്ത്രശ്രമങ്ങളാണ് ഹരിത രസതന്ത്രത്തിന്റെ ഉദയത്തിന് കാരണം. 1987ല്‍ ഐക്യരാഷ്ട്ര സംഘടനയുടെ ഔവര്‍ കോമണ്‍ ഫ്യൂച്ചര്‍ എന്ന റിപ്പോര്‍ട്ടിനെതുടര്‍ന്ന് 1990ല്‍ അമേരിക്കയില്‍ മലിനീകരണ നിയന്ത്രണ നിയമം നിലവില്‍ വന്നു. തൊട്ടടുത്ത വര്‍ഷം യുഎസ് എന്‍വയണ്‍മെന്റ് പ്രൊട്ടക്ഷന്‍ ഏജന്‍സി ഹരിത രസതന്ത്ര പ്രവര്‍ത്തനങ്ങള്‍ ആരംഭിച്ചു. ഇന്ന് ലോകമെങ്ങും നിരവധി സ്ഥാപനങ്ങള്‍ ഹരിത രസതന്ത്ര പ്രവര്‍ത്തനങ്ങള്‍ക്കും ഗവേഷണങ്ങള്‍ക്കും പ്രോത്സാഹനം നല്‍കുന്നുണ്ട്.
പ്ളാസ്റ്റിക് ഇനി കാര്‍ഷിക അവശിഷ്ടങ്ങളില്‍നിന്ന്
പോളിലാക്ടിക് പോളിമര്‍ ഉപയോഗിച്ച് കാര്‍ഷിക അവശിഷ്ടങ്ങളില്‍നിന്ന് പ്ളാസ്റ്റിക് നിര്‍മിക്കുന്നതിനുള്ള പരീക്ഷണങ്ങളില്‍ ഇംഗ്ളണ്ടിലെ യൂണിവേഴ്സിറ്റി ഓഫ് കണക്റ്റിക്കറ്റിലെ ഗവേഷകര്‍ വിജയപഥത്തിലെത്തി. സൌത്ത് കരോലിന യൂണിവേഴ്സിറ്റിയിലെ ഗവേഷകര്‍ പൈന്‍, കോണിഫറസ് മരങ്ങളില്‍നിന്ന് ലഭിക്കുന്ന റെസിന്‍(മരക്കറ) ഉപയോഗിച്ച് പ്ളാസ്റ്റിക് നിര്‍മിക്കാനുള്ള പരീക്ഷണങ്ങളിലും വിജയമുറപ്പാക്കി. ലോകത്ത് പ്രതിവര്‍ഷം നിര്‍മിക്കപ്പെടുന്ന പ്ളാസ്റ്റിക്കുകള്‍ ഭൂമിക്ക് നിരവധി ദോഷങ്ങള്‍ സമ്മാനിക്കുന്നുണ്ടെന്ന് നമുക്കറിയാം. നവീന ഗവേഷണത്തില്‍പെട്ട ജൈവവിഘടന സ്വഭാവമുള്ള പ്ളാസ്റ്റിക്കുകള്‍ ഈ പ്രശ്നങ്ങളില്‍നിന്ന് മോചനം നല്‍കുമെന്ന് പ്രതീക്ഷിക്കാം.
ജനിതക ബാക്ടീരിയകള്‍
നൈട്രജന്‍ സസ്യജന്തുജാലങ്ങള്‍ക്ക് അത്യന്താപേക്ഷിതമാണെന്ന് അറിയാമല്ലോ. ജന്തുക്കള്‍ക്ക് ഭക്ഷണത്തിലൂടെ ലഭിക്കുമ്പോള്‍ സസ്യങ്ങള്‍ക്ക് മണ്ണിലൂടെയാണ് ഇവ ലഭിക്കേണ്ടത്. ഇടിമിന്നലിലൂടെയും മഴയിലൂടെയും അന്തരീക്ഷത്തിലെ നൈട്രജന്‍ മണ്ണിലെത്താറുണ്ട്. പയര്‍ വര്‍ഗത്തില്‍പ്പെട്ട ചെടികളുടെ വേരില്‍ കാണുന്ന റൈസോബിയം ബാക്ടീരിയകള്‍ അന്തരീക്ഷത്തില്‍ നിന്ന് നേരിട്ട് ആഗിരണം ചെയ്യുന്നുണ്ട്. ഇത് മനസ്സിലാക്കിയ ഗവേഷകര്‍ മറ്റുള്ള ബാക്ടീരിയകളിലും റീ കോമ്പിനന്റ് ഡിഎന്‍എ ടെക്നോളജിയിലൂടെ സ്വയം നൈട്രജന്‍ സ്ഥിരീകരണം നടത്താനുള്ള കഴിവ് നല്‍കാനുള്ള പരീക്ഷണങ്ങളിലാണ്. പ്രസ്തുത ജീനുകള്‍ സസ്യങ്ങളില്‍ സന്നിവേശം നടത്തിയാല്‍ സസ്യങ്ങള്‍ക്ക് ആവശ്യമായ സമയത്ത് അന്തരീക്ഷത്തില്‍നിന്ന് നൈട്രജന്‍ സ്ഥിരീകരണം നടത്താം. ജനിതക ബാക്ടീരിയകളെ പരിസര ശുദ്ധീകരണത്തിനും ഉപയോഗപ്പെടുത്താം. സൂപ്പര്‍ ബഗ്സ് പോലെയുള്ള എണ്ണ ഭക്ഷിക്കുന്ന ബാക്ടീരിയകള്‍ വന്‍തോതിലുള്ള എണ്ണ മലിനീകരണത്തെ ഇല്ലായ്മ ചെയ്യാന്‍ രംഗത്ത് വന്നുകഴിഞ്ഞു.എന്‍ഡോസള്‍ഫാനെ വിഘടിപ്പിച്ച് പരിസ്ഥിതിക്ക് ദോഷകരമല്ലാത്ത ഘടകങ്ങളാക്കി മാറ്റുന്നതിനുള്ള പരീക്ഷണങ്ങളില്‍ മദ്രാസ് ഐഐടി യിലെ ഗവേഷകര്‍ ഇതിനകം വിജയിച്ചു കഴിഞ്ഞു.
ആഗോളതാപനത്തിന് കോണ്‍ക്രീറ്റിന്റെ സംഭാവന ശ്രദ്ധേയമാണല്ലോ. ഇപ്പോള്‍ താപന തോത് കുറയ്ക്കുന്നതും കൂടുതല്‍ ശക്തിയാര്‍ജിച്ചതുമായ ഗ്രീന്‍ കോണ്‍ക്രീറ്റ് നിര്‍മാണത്തിലും അമേരിക്കയിലെ മസാച്യു സെറ്റ്സ് ഇന്‍സ്റ്റിറ്റ്യൂട്ട് ഓഫ് ടെക്നോളജിയിലെ ഗവേഷകര്‍ വിജയിച്ചു കഴിഞ്ഞു. കോണ്‍ക്രീറ്റ് ഉയര്‍ത്തുന്ന മറ്റൊരു പാരിസ്ഥിതിക പ്രശ്നമാണ് അവയുടെ സംസ്കരണം. ഗ്രീറ്റ് കോണ്‍ക്രീറ്റിലൂടെ ഈ പ്രശ്നത്തിന് ശാശ്വത പരിഹാരമാകുമെന്നാണ് ശാസ്ത്ര ലോകത്തിന്റെ പ്രതീക്ഷ.
ബി ടി വിളകളും കീടനാശിനികളും
കാര്‍ഷിക വിളകളെ ആക്രമിച്ചിരുന്ന കീടങ്ങളെ തുരത്താനായിരുന്നു മനുഷ്യന്‍ ആദ്യമായി കീടനാശിനികള്‍ ഉപയോഗിച്ച് തുടങ്ങിയത്. കീടനാശിനികളെ അതിജീവിച്ച കീടങ്ങള്‍ വിളകളെ നശിപ്പിക്കുന്ന പ്രവൃത്തി തുടര്‍ന്നപ്പോള്‍ കൂടുതല്‍ നശീകരണ ശേഷിയുള്ള രാസവസ്തുക്കള്‍ക്ക് പിന്നാലെയായി ഗവേഷണങ്ങള്‍. ഇതിനിടെ വര്‍ധിച്ച തോതിലുള്ള കീടനാശിനി പ്രയോഗംമൂലം പല വിധത്തിലുള്ള മാരക രോഗങ്ങള്‍ക്കും ജീവജാലങ്ങള്‍ അടിമയായി. ഈ അവസ്ഥയില്‍നിന്നുള്ള മോചനമായാണ് കീടനാശിനികള്‍ക്കെതിരെ സ്വയം പര്യാപ്തത നേടിയ ബിടി വിളകളുടെ ആഗനമം. ലോകമെങ്ങും വന്‍ വിവാദങ്ങള്‍ സൃഷ്ടിച്ചു കൊണ്ടിരിക്കുന്ന ബിടി വിളകളിലെ അടിസ്ഥാനം ബാസില്ലസ് തുറിന്‍ജിയന്‍സ് എന്ന ബാക്ടീരിയയാണ്. പ്രസ്തുത ബാക്ടീരിയ ഉല്‍പാദിപ്പിക്കുന്ന എന്‍ഡോടോക്സിന്‍ കീടങ്ങളുടെ ദഹനവ്യവസ്ഥക്ക് തകരാറുണ്ടാക്കി കൊന്നൊടുക്കുമെന്നതാണ് പ്രധാന നേട്ടം. ബാഹ്യമായൊരു കീടനാശിനിയുടെ സഹായമില്ലാതെ വിളകള്‍തന്നെ കീടങ്ങളെ കൊന്നൊടുക്കുന്നത് ഗ്രീന്‍ കെമിസ്ട്രിയുടെ നേട്ടങ്ങളിലൊന്നാണ.്
ലോകജനതക്ക് ഭീതി സമ്മാനിക്കുന്ന ആണവ നിലയങ്ങള്‍ സൃഷ്ടിക്കുന്ന മാലിന്യങ്ങള്‍ക്ക് പരിഹാരമാണ് ഗ്രീന്‍ ആണവനിലയങ്ങള്‍. ചൈനീസ് സയന്‍സ് അക്കാദമി ഗ്രീന്‍ ആണവനിലയങ്ങള്‍ വികസിപ്പിച്ചെടുത്തതോടെ ലോകമെങ്ങുമുള്ള ആണവനിലയ മാലിന്യങ്ങളുടെ അളവും ഭീതിയും കുറയ്ക്കാനാകും.
പത്താം ക്ലാസ് രസതന്ത്രത്തിലെ രസതന്ത്രം നിത്യജീവിതത്തില്‍ എന്ന ഭാഗത്തിനാവശ്യമായ പഠനക്കുറിപ്പ്
കടപ്പാട്: deshabhimani-aksharamuttam
No comments:
Post a Comment